Муомаҕа оскуола үбүлүөйдээх кэнсиэрэ үрдүк таһымнаахтык буолла

Муома алын сүһүөх оскуолата орто оскуолаттан арахсан туспа барбыта үйэ чиэппэрэ буолла. Бу бэлиэ күҥҥэ анаан М.П.Михалева дириэктэрдээх начаалынай оскуола биир ый устата араас дьаһаллары ыытар. Иллээх кэллэктиип оҕоҕо дириҥ билиини иҥэрэргэ, эт-хаан өттүнэн сайдарыгар, материальнай баазаны хаҥатыыга утумнаахтык үлэлэһэр. Аныгылыы тэриллэрдээх кылаастарга үөрэнээччилэр күнтэн күн элбэҕи билэллэр, үүнэллэр-сайдаллар. 2015 с. оҕолор сайыҥҥы сынньалаҥнарын туһалаахтык тэрийэр соруктаах «Олимп» лааҕыр тутуллубута. Онтон үбүлүөйдээх сылга оскуола СӨ Ил Дарханын Е.А.Борисов Гранын хаһаайынынан буолла. Ситиһииттэн кынаттанан кэллэктиип иитэр-үөрэтэр таһымын өссө үрдэтэргэ, үлэтин кэҥэтэргэ дьулуһар.

Соторутааҕыта бу киэн туттар тэрилтэбит «Осикат» сынньалаҥ киинигэр «Махтал Эйиэхэ, төрөөбүт оскуолам» диэн ааттаах эҕэрдэ кэнсиэри туруорда. Кэнсиэргэ оскуола бары кылаастарын оҕолоро, учууталлара көхтөөхтүк кытыннылар. Бииртэн биир киһини манньытар, үөрдэр сонун нүөмэрдэр солбуллан истилэр. Ырыа-тойук, үҥкүү-битии, хомус тыаһа мустубут дьону астыннарда. «Оскуола өрөгөйүн ырыатыттан» саҕалаан ыһыах көрө-нара, доҕордоһуу түһүлгэтэ, сайылык оҕолорун оонньуулара, «Урааҥхайдар үҥкүүлэрэ», «Боотурдар үҥкүүлэрэ» оҕо-аймах төрөөбүт оскуолатынан киэн туттарын, махтанарын толору ойуулаан көрдөрдө.

Оскуолаҕа айымньылаахтык үлэлии сылдьар учууталлар ырыаны-үҥкүүнү сиэтэн киллэрдилэр. Эдэр көлүөнэ учууталлар сахалыы, дьоппуоннуу, украинскай үҥкүүлэрэ, Антонина Слепцова монологтара, Анастасия Слепцова соҕотоҕун ыллааһына, Артур уонна Лилиана Тарабукиннар «Венскэй вальс» үҥкүүлэрэ, ансаамбыл ырыалара, «Куйаар» фольклорнай ансаамбыл улахан биһирэбили ыллылар. Кэнсиэр «Учуутал гимнинэн» түмүктэннэ.

Бу долгутуулаах дьоро киэһэҕэ оройуон дьаһалтатыттан Х.Кривошапкина, Муома нэһилиэгин дьаһалтатыттан П.Гермогенов, оскуола урукку директора В.Никулина, бу үөрэх кыһатын урут бүтэрбит выпускниктар, төрөппүттэр истиҥ эҕэрдэлэрин тиэртилэр. Директор Марианна Петровна бэтэрээн учууталларга тыыннаах сибэкки дьөрбөлөрүн тутарда.

Кэнсиэри истиҥ-сылаас тылларынан Сардаана Сидорова, Тит Матвеев салайан ыыттылар. Оҕолорго үҥкүүлэри Лилиана Егоровна, Люлия Ивановна Тарабукиналар, учууталларга Любовь Федорова туруордулар.